Элан Мэлі / Alan Maley «Дрэва мовы»

 ДРЭВА МОВЫ

З дрэва мовы

Падаюць лісточкі

Крыж-накрыж, кружляюць,

Выпісваюць на зямлі ўзоры,

Кадзіруюць пасланні года.

Ватныя пласты

Мінулых гадоў

Дыстылююць старыя значэнні.

А сярод каранёў

Варушацца ў сне,

Мармычуць і прамаўляюць

Паўзабытыя словы.

А ўверсе,усе ў пупышках,

Канцы галінак думаюць

Пра значэнні для

Наступных гадоў.

Як быццам адной
Формы і памеру,
Дрэва кожны год
Няўлоўна іх змяняе.
Маленькае дзіва —
Гэтае дрэва мовы.

пераклад Алены Таболіч